Sjómannadagurinn var haldinn hátíðlegur í fyrsta skipti hinn 6. júní árið 1938. Sá dagur var mánudagur, annar í hvítasunnu. Næstu ár var fylgt reglu sem á endanum var lögtekin árið 1987, að sjómannadagur skyldi vera fyrsti sunnudagur í júní nema hvítasunnu bæri upp á þann dag. Þá skyldi sjómannadagurinn vera viku síðar. Áður en lögin voru sett var vikið frá reglunni í þau sex skipti sem hér verða talin. Árið 1963 var sjómannadagurinn haldinn á annan í hvítasunnu. Árin 1965-1968 var haldið upp á daginn í maímánuði. Árið 1986 var deginum frestað til 8. júní vegna sveitarstjórnarkosninga í kaupstöðum og kauptúnahreppum laugardaginn 31. maí. Þegar almanakið fyrir 1986 var prentað, var ekki vitað um frestunina og því var 1. júní auðkenndur sem sjómannadagur það ár, en dagurinn hafði fyrst verið tekinn upp í almanakið árið 1984. Hér fer á eftir listi yfir dagsetningar sjómannadags fram að lagasetningunni 1987. Listinn er fenginn frá Sjómannadagsráði.
 

1938   6. júní	1948   6. júní	1958   1. júní	1968  26. maí	1978  4. júní
1939   4. júní	1949 12. júní	1959   7. júní	1969   1. júní	1979 10. júní
1940   2. júní	1950   4. júní	1960  12. júní	1970   7. júní	1980   1. júní
1941   8. júní	1951   3. júní	1961   4. júní	1971   6. júní	1981 14. júní
1942   7. júní	1952   8. júní	1962   3. júní	1972   4. júní	1982   6. júní
1943   6. júní	1953   7. júní	1963   3. júní	1973   3. júní	1983   5. júní
1944   4. júní	1954 13. júní	1964   7. júní	1974   9. júní	1984   3. júní
1945   3. júní	1955   5. júní	1965 30. maí	1975   1. júní	1985   2. júní
1946   2. júní	1956   3. júní	1966 15. maí	1976 13. júní	1986   8. júní
1947   1. júní	1957   2. júní	1967 28. maí	1977   5. júní	1987 14. júní

Þ.S. 26. apríl 2008.