|
Plútó er venjulega talinn ysta reikistjarnan í sólkerfinu, en
vegna þess hve braut hans um sólu er er ílöng, getur hann
gengið inn fyrir braut næstu reikistjörnu, Neptúnusar.
Þetta gerðist einmitt árið 1979, og hefur Plútó síðan verið
nær sól en Neptúnus. Í ár (1999) gekk Plútó svo aftur út
fyrir braut Neptúnusar. Hvaða dag það myndi gerast, var ekki alveg
víst. Smávægileg óvissa ríkir enn um gang ystu
reikistjarnanna og stöðugt er unnið að því að endurbæta brautarreikningana.
Hvað Plútó snertir er rétt að benda á að athuganir
ná aðeins yfir fjórðung af umferðartíma hans um sól, sem er 250 ár.
Í Almanaki Háskólans fyrir árið 1999 segir að Plútó gangi út fyrir braut Neptúnusar í júnímánuði. Þetta var byggt á gamalli heimild sem því miður reyndist ótraust. Nýrri upplýsingar benda til þess að umræddur atburður hafi orðið í febrúar. Samkvæmt gögnum frá stofnunum sem annast útgáfu alþjóðlegra stjörnualmanaka gerðist þetta hinn 9. febrúar, en nýjustu tölur frá bandarísku geimferðastofnuninni NASA benda fremur til 10. eða 11. febrúar. Fjarlægð beggja reikistjarna frá sólu var þá 4,5 milljarðar kílómetra (30,1 stjarnfræðieining), en þær komu þó ekki nærri hvor annarri; bilið milli þeirra var 4,1 milljarður km (27,5 stjarnfræðieiningar) svo að árekstarhætta var engin! Þ.S. jan. 1999
|