|
Hinn
12. ágúst 2018 skaut Geimvísindastofnun Bandaríkjanna (NASA) á loft
geimkanna sem bar nafnið Parker. Nafnið var valið til heiðurs
stjarneðlisfræðingnum Eugene Parker sem fyrstur varð til að setja
fram kenningu um sólvindinn, straum rafagna sem flæðir frá sólu
(1958). Kannanum var skotið á braut sem er afar ílöng og
fer nær sólu en nokkur kanni hefur áður gert. Fær hann þá meiri hraða
en dæmi eru um. Alls mun kanninn ganga sjö sinnum um sólina áður en
rannsóknaferlinu lýkur árið 2025. Hinn 21. nóvember 2021, í fimmtu
umferðinni, var Parker aðeins 10 milljón km frá yfirborði sólar. Hraði
hans var þá 530 þúsund km á sekúndu. Með hverri umferð fer
kanninn nær sólu. Að sjálfsögðu eru miklar ráðstafanir gerðar til að
hindra það að hitinn frá sólinni eyðileggi mælitækin, en óvíst er
hve lengi þær ráðstafanir duga.
Á
myndinni hér fyrir neðan, sem fengin er af einni vefsíðu NASA, sést
ferill kannans. Gulu baugarnir eru þeir ferlar sem kanninn hefur
þegar þrætt, en ófarnir ferlar eru sýndir með rauðum lit.
Umferðarbrautir reikistjarnanna (jarðar, Venusar og Merkúríusar)
sjást til samanburðar. |
