Þessi vígahnöttur sást á kvikmynd sem tekin var með eftirlitsmyndavél á Fagurhólsmýri. Sást blossinn fara niður allbratt yfir Öræfajökli og var kominn niður fyrir hábungu jökulsins þegar hann hvarf vinstra megin við bunguna. Frá Grindavík sást hnötturinn lágt á himni milli aust-norðausturs og norðausturs, fara frá hægri til vinstri, fremur aflíðandi niður á við. Þetta bendir til þess að ferillinn hafi legið skammt sunnan við Mývatn, á að giska 310 km frá Grindavík og 170 km frá Fagurhólsmýri. Frá Grindavík séð var hnötturinn ámóta bjartur eða jafnvel bjartari en neyðarblys (sólir) sem skotið er upp á áramótum, en eru auðvitað margfalt nær athuganda. Athugunarmaður í Grindavík, Guðmundur Birkir Agnarson, gaf mjög nákvæma lýsingu á átt og stefnu. Blossinn sást einnig úr bifreið sem var á Reykjanesbraut, á móts við Hvassahraun, og bar lýsingum vel saman.