Þorsteinn Sæmundsson:

Merkismaður látinn

Sigurður Kr. Árnason húsasmíðameistari, listmálari og áhugamaður um jarðfræði, skógrækt, stjörnufræði og fleira, er látinn, 92 ára að aldri. Hans er getið hér vegna þess að Stjörnuskoðunarfélag Seltjarnarness á tilurð sína honum að þakka. Vorið 1974 kom Sigurður á minn fund og sagðist vilja kaupa stjörnusjónauka sem komið yrði fyrir undir hvolfþaki á Valhúsaskóla með aðgangi fyrir áhugamenn. Sigurður hafði séð um byggingu skólans eins og fleiri þekktra mannvirkja. Sjónaukann pantaði Sigurður síðar á árinu. Þetta var 14 þumlunga spegilsjónauki, sá stærsti á landinu á þeim tíma.

Í framhaldi af þessu var rætt um stofnun áhugamannafélags, og tveimur árum síðar, hinn 11. mars 1976, var Stjörnuskoðunarfélag Seltjarnarness stofnað á fjölmennum fundi í Valhúsaskóla. Sigurður sat sjálfur í fyrstu stjórn félagsins ásamt undirrituðum og Sigfúsi Thorarensen verkfræðingi. Engin mynd hefur fundist af stjórninni frá þessum tíma, en fjörutíu árum síðar, í maí 2016, bauð Sigurður fyrrverandi stjórnarmönnum heim til sín og tók Örn, sonur Sigurðar, þá mynd sem hér fylgir með. 
  

Sett á vefsíðu 24.11. 2017