|
Horft að endimörkum alheims
Í mars 2004
birtu stjörnufræðingar við Vísindastofnun geimsjónaukans (Space Telescope
Science Institute) einstæða mynd sem tekin var með Hubble-sjónaukanum.
Myndin var tekin þannig að sjónaukanum var beint að sama stað á himni
hvað eftir annað og ljósi safnað í samtals 12 sólarhringa. Notaðar voru
tvær myndavélar og var önnur næm fyrir innrauðu ljósi. Með þessu móti
náðist mynd af mjög daufum og fjarlægum vetrarbrautum, nálægt endimörkum
hins sýnilega heims. Valinn var staður á suðurhimni í stjörnumerkinu
Ofninum (Fornax) þar sem engar nálægar stjörnur var að sjá. Svæðið á
himninum sem myndin nær yfir er um 1/10 af þvermáli tunglsins. Á myndinni
sjást á að giska tíu þúsund vetrarbrautir, og er talið að þær daufustu
séu meira en13 milljarða ljósára frá jörðu. Nánari upplýsingar er að
finna í þessari fréttatilkynningu.
Þar er einnig að finna skýrari eintök af myndinni. |
