|
Glitský |
|
Glitský, öðru nafni
perlumóðurský , eru einstaklega litfögur ský sem helst sjást á
heimskautasvæðum þegar kuldi í háloftunum verður óvanalega mikill. Á
vefsvæði Alþjóða-veðurstofunnar segir að litbrigðin verði að öllum
líkindum við ljósbrot í hnattlaga ískristöllum sem séu nokkrir
míkrómetrar í þvermál. Um hitastigið segir að það sé – 85°C, en á
öðrum stað að það þurfi að vera lægra en –120°C. Báðar tölurnar eru
á sama vefsvæði. Um hæð yfir jörðu er ekki getið, en aðrar heimildir
segja 20–85 km (tölurnar eru mjög á reiki). Þau eru því í meiri hæð
en venjuleg ský sem myndast í veðrahjúpnum. Glitský sjást gjarna
þegar sól er skammt fyrir neðan sjóndeildarhring. Venjuleg ský eru
þá í skugga. Meðfylgjandi mynd af glitskýi tók Snævarr Guðmundsson
við vatnið Þveit í Hornafirði að kvöldi 24. janúar 2023. |
